ब्रेकिंग

गुन्हेगारी जगत

चौथ्या मजल्यावरुन उडी मारून विवाहितेची आत्महत्या

Wrutuja pandharpure
02 Apr 2025

कवठे येमाई, (वार्ताहर) : तळेगाव ढमढेरे (ता. शिरुर) येथे पती, सासू व नणंद पासून होणार्‍या छळाला कंटाळून एका विवाहितेने इमारतीच्या चौथ्या मजल्यावरून उडी मारून आत्महत्या केल्याची धक्कादायक घटना घडली. पोर्णिमा गणेश धोत्रे असे या आत्महत्या केलेल्या विवाहितेचे नाव आहे. या प्रकरणी शिक्रापूर पोलिस स्टेशन येथे विवाहितेला आत्महत्येस प्रवृत्त केल्या प्रकरणी सासरकडील तिघांवर गुन्हा दाखल करण्यात आला आहे.

तळेगाव ढमढेरे येथे राहणार्‍या पोर्णिमा धोत्रे हिचा तीन महिन्यांपूर्वी विवाह झालेला होता. विवाहानंतर पोर्णिमाचा पती गणेश धोत्रे, सासू मंगल धोत्रे तसेच नणंद सोनाली ननवरे हे पोर्णिमाला किरकोळ कारणातून शिवीगाळ, दमदाटी करत तू केलेले जेवण जास्त बनवते ते वाया जाते, तुझ्यामुळे आमची बरबादी झाली, तू आमच्या घरातून निघून जा असे म्हणून तिचा मानसिक व शारीरिक छळ करत होते. वारंवार होणारा त्रास सहन न झाल्याने तसेच होणार्‍या त्रासाला कंटाळून ३० मार्च रोजी पोर्णिमा हिने घराला बाहेरुन कडी लावून इमारतीच्या छतावर जाऊन चौथ्या मजल्यावरुन उडी मारली.

पोर्णिमा गंभीर जखमी झाल्याने तिला उपचारासाठी खाजगी रुग्णालयात दाखल करण्यात आले. मात्र उपचारावेळी पोर्णिमा गणेश धोत्रे (वय २२ रा. तळेगाव ढमढेरे ता. शिरुर जि. पुणे) हिचा मृत्यू झाला. याबाबत विवाहितेचे वडील रामदास गेनबा जाधव (वय ५० डोंगरगाववाडी लोणावळा ता. मावळ जि. पुणे) यांनी शिक्रापूर पोलीस स्टेशन येथे फिर्याद दिल्याने पोलिसांनी विवाहितेचा पती गणेश तानाजी धोत्रे, सासू मंगल तानाजी धोत्रे दोघे (रा. तळेगाव ढमढेरे ता. शिरुर जि. पुणे) तर नणंद सोनाली लखन ननवरे (रा. खर्डा ता. जामखेड जि. अहिल्यानगर) यांच्या विरुद्ध गुन्हा दाखल करण्यात आला आहे. पती गणेश व सासू मंगल धोत्रे या दोघांना अटक करण्यात आली असून, पुढील तपास सहाय्यक महिला पोलीस निरीक्षक रोहिणी सोनावले करत आहे.